వ్యవసాయ చట్టాలపై సుప్రీం ఉక్కుపాదం

కేంద్రం ఇటీవల తీసుకొచ్చిన మూడు వ్యవసాయ చట్టాలపై సుప్రీంకోర్టు స్టే విధించింది. ఈ మేరకు సుప్రీంలో జరిగిన వాదోపవాదనలను విన్న కోర్టు ఈ మేరకు తన నిర్ణయాన్ని ప్రకటించింది.

దేశ రాజధాని ఢిల్లీలో భయంకరమైన వాతావరణాన్ని సైతం లెక్క చేయకుండా ధర్నా చేస్తున్న రైతుల బాధను కేంద్రం అర్ధం చేసుకోవడంలో విఫలమైందని నిన్న వ్యాఖ్యానించిన సుప్రీం.. ఈరోజు తాజా తీర్పును వెలువరించింది.

సుప్రీం చీఫ్​ జస్టిస్​ ఎస్​ ఎ బాబ్డేతో పాటు ధర్మాసనంలోని మిగతా ముగ్గురు సభ్యుల న్యాయమూర్తులు సైతం కొత్త చట్టాలపై స్టే విధిస్తున్నట్లు ప్రకటించారు.

కమిటీలో సభ్యులు ఎవరు?

కొత్త చట్టాలపై కూలంకషంగా నివేదికను అందించాలని సుప్రీం పేర్కొంటూ.. భారతీయ కిసాన్​ యూనియన్​ ప్రతినిధి హెచ్​.ఎస్​.మన్​, అంతర్జాతీయ ఫుడ్​ పాలసీ రీసెర్చ్​ ఇన్​స్టిట్యూట్​ సౌత్​ ఆసియా డైరెక్టర్​ ప్రమోద్​ కుమార్​ జోషి, వ్యవసాయ ఆర్ధిక వేత్త అశోక్​ గులాటి, శేట్కారి సంఘటన్​ ప్రతినిధి అనిల్​ ధన్వంత్​లతో కూడిన నలుగురు సభ్యుల కమిటీని నియమించింది.

చీఫ్​ జస్టిస్​ ఏమన్నారు?

‘‘మేం ఈ సమస్యను వీలైనంత సుహృద్భావ వాతావరణంలోనే పరిష్కరించాలని ప్రయత్నిస్తున్నాం. ఈ చట్టాలను రద్దు చేయడానికి మాకున్న హక్కుల్ని ఈ సందర్భంగా ఉపయోగించి ఈ చట్టాలపై స్టే విధిస్తున్నాం” అని తీర్పులో చీఫ్​ జస్టిస్​ ఎస్​ ఎ బాబ్డే వెల్లడించారు.